Историјат

Почетоци и развој на Институтот за математика

П​очетоците на Институтот за математика се  совпаѓаат со почетоците на Универзитетот „Св. Кирил и Методиј“ во далечната 1946 година. Имено, во рамките на тогашниот Филозофски факултет биле формирани Историско-филолошки и Природно-математички оддел. Катедрите за математика, физика, хемија, биологија и географија со етнологија што биле формирани во склоп на Природно-математичкиот оддел, започнале да ја изведуваат првата високошколска настава на 16 декември 1946 година и за прв пат во македонската историја - на македонски јазик. На Катедрата за математика наставата ја изведувале тројца професори и двајца соработници.

Во 1958 година, Природно-математичкиот оддел прераснува во Природно-математички факултет, а Катедрата за математика - во Институт за математика. Со реформите во 1977 година Институтот за математика, заедно со другите катедри по математика од техничките факултети во Скопје, формираат Математички факултет при Центарот за математичко-технички науки при Универзитетот Св."Кирил и Методиј" во Скопје. Вo 1985 година, со повторните измени во ораганизацијата на Универзитетот, повторно е формиран Природно-математичкиот факултет. Математичкиот факултет преминал повторно во Институт за математика како посебна работна единица при Природно-математичкиот факултет  и како таква опстојува и денес. Институтот за математика е структуриран во четири заводи: завод за алгебра и геометрија, завод за анализа, завод за топологија и завод за применета математика.

Денес, Институтот за математика има постигнато завидно ниво во научната работа, а ги има задржано и високите стандарди во изведувањето на наставата. Во својата долгогодишна работа, покрај тоа што води сметка да ја зачува традицијата, тој ги следи и современите текови во науката и технолошкиот развој. Преку дванаесетте нови студиски програми (на додипломски, постдипломски и докторски студии), наставниот процес е целосно прилагоден на барањата на модернитепрофесионални предизвици, како и на најновите трендови на истражување во науките. Институтот за математика формира квалитетни кадри коишто можат да одговорат на предизвиците на современиот живот.

Дел од членовите на Институтот за математика
(фотографијата е сликана во Библиотеката на Институтот за математика во септември 2016 год.)

Дел од членовите на Институтот за математика
(фотографијата е сликана во Библиотеката на Институтот за математика во јуни 2006 год.)